Додољон Атовуллоев ҳақиқатро баён мекунад

Дар сомонаи иғвобарангез ва ифротии “Ахборком” мақолае бо номи “Як бому ду ҳавои Додоҷон Атовуллоев” нашр гардидааст, ки аз бадхоҳӣ ва душманӣ варзидани роҳбару масъулони ин расонаи хабарӣ ба Тоҷикистон шаҳодат медиҳад. Зеро баръало маълум аст, ки аз мақолаҳои ахири Додоҷон Атовуллоев, ки ТТЭ ҲНИ-ро мавриди танқид қарор додааст ва сирри наҳзатиҳоро фош кардааст, хеле нороҳатанд. Чунин ба назар мерасад, ки роҳбарону кормандони сомонаи “Ахборком” ҳаммаслаки наҳзатиҳои террорист ҳастанд.

Дар асл, Додоҷон Атовуллоев ҳамчун як рӯзноманигори озод воқеаҳои дар гузаштаи начандон дур гузаштаро бо тарзи воқеъбинона инъикос  кардааст ва аз иштироки худ дар он равандҳои хатарноку зиддимиллӣ хеле пушаймон буданашро ҷавонмардона баён намудааст.Маълум аст, ки вай  баъди аз сар гузаронидани пастию баландиҳои зиёди зиндагӣ ва сару кор доштанҳо бо ҳар гуна афроде ки худро дӯстдори ватану миллат вонамуд мекунанду дар асл хоину ҷинояткоранд (мисли Кабирӣ ва ғайраҳо), ба чунин натиҷа расидааст ва имрӯз ба хубӣ дарк кардааст, ки душмани Тоҷикистон ва сабабгори бадбахтиҳои ин кишвар дар солҳои навадум маҳз ҳамин наҳзатиҳо будаанд. Додоҷон Атовуллоев мисли қаламбадастони наҳзатӣ ва “Ахборком”-ӣ афсонабофӣ накардааст. Вай амалҳои бо чашми сар дида ва суханони бо гушҳояш шунидаро навиштааст. Ба фарқ аз “Ахборком” Додоҷон Атовуллоев дар бораи наҳзатиҳо ҳақиқатро баён мекунад.

Имрӯз Атовуллоев агар дар бораи пешрафтҳои Тоҷикистон, масалан ба кор даромадани НБО Роғун мақола таълиф кунад магар айб дорад? Ё ба роҳбари “Ахбоком” фақат сиёҳ кардани ватан даркор аст? Мирзои Салимпур ҳам бояд аз Додоҷони Атовулло ибрат гираду иғвоангезию туҳмат кардани Ҳукумату давлати Тоҷикистон ва душманиашро бо мардум бас кунад ва воқеъаҳоро воқеъбинона инъикос намояд. Агар чунин намекунад, пас,  Мирзои Салимпур бо сомонаи “Ахборком”-аш бозичаи дасти ташкилоти террористӣ-экстремистии Ҳизби наҳзати исломӣ ва доираҳои манфиатдори хориҷӣ мебошад. М.Салимпур Додоҷони Атовуллоро туҳмат мекунад, ки фурухта шудааст ва бо Ҳукумат гӯё муомилае кардааст.

Аммо М. Салимпур худашро намебинад, ки имрӯз муздури хориҷиҳо ва ҳаммаслаки наҳзатиҳои террорист гардидааст? Барои дарёфти пулу мол ватану мардуми худро туҳмат мекунад. Ҳар нафаре ки як ҳарфи хубе дар бораи Тоҷикистон гуфту навишт, ӯро ҳатман фурухташудаву мансуб ба “фабрикаи ҷавоб” меҳисобад.

Масъулони “Ахборком” Дориюши Раҷабиёнро “рӯзноманигори шинохтаи тоҷик” номида, навиштаҳои туҳматноки ӯро низ дар ҳаққи Д.Атовуллоев  мисол меоранд. Аммо Дориюш Раҷабиён (Раҷабов Шавқат) шояд барои “Ахборком” ва хонаводааш “рӯзноманигори шинохта” бошад. Барои мардуми Тоҷикистон ин нафар шинохта нест. Фақат маълум аст, ки ному насабашро аз Раҷабов Шавқат ба Дориюш Раҷабиён иваз кардаасту дар хизмати Радиои хориҷии ВВС дар Лондон қарор дорад. Навиштаҳои пойдарҳавои вай ягон арзише барои ватану миллат надоранд.

“Ахборком” дар матлабаш рӯйи рост дуруғ менависад, ки Додоҷон Атовуллоев гӯё дигар мустақил несту аз Ҳукумати Тоҷикистон пул мегирад. Ҳатто агар чунин ҳам бошад, магар аз Ҳукумату давлати худ пул гирифтан мумкин нест?  Чӣ Мирзои Салимпур ва Дориюши Раҷабиён, ки бо пулҳои давлатҳою ташкилотҳои хориҷӣ зиндагӣ доранд, магар мустақиланд?

Диловари Хуршед, таҳлилгар